مخدوم جميل الزمان

جميل الزمان ’جميل‘، مخدوم: مخدوم جميل الزمان ’جميل‘ مخدوم امين فهيم جي گهر ۾ 27 جولاءِ 1961ع تي هالا ۾ جنم ورتو. سندس تربيت علمي ۽ ادبي ۽ روحاني ماحول ۾ ٿي، ان ڪري سندس 1981ع کان علم، ادب ڏانهن ذهني لاڙو ٿيو. شاعريءَ ۾ پنهنجي ڏاڏي ۽ سنڌ جي عظيم شاعر مخدوم محمد زمان طالب الموليٰ کان رهنمائي ورتي. اهو ئي ڪارڻ آهي جو سندس شاعريءَ ۾ پختگيءَ سان گڏ خيال جي گهرائي ۽ نواڻ موجود آهي. نثر جي ميدان ۾ سندس لاڙو تحقيق ۽ تاريخ طرف آهي، کيس ٻنهي مضمونن جو وسيع مطالعو، مشاهدو ۽ تحقيقي ڄاڻ آهي. شاعري، تحقيق، تـاريـخ، سـوانـح ۽ ٻيـن مـوضـوعـن تـي سندس هيٺيان ڪتاب ڇپيل آهن: (1) اتر لڳا آءُ پرين (شاعري)، (2) دلربا دلربا (شاعري)، (3) سنڌ جي واقعاتي تاريخ، (4) تــذڪـره مخـدومــان هـالا، (5) خير شيرازي (لغت)، (6) ملاقات (شاعري)، (7). محبت پائي من ۾، (8) سيد فتح محمد شاهه اجناڻي (سوانح ۽ ڪلام)، (9) انهن سندي ڳالهڙي (ترتيب)، (10) منهنجو ننڍپڻ (مخدوم طالب الموليٰ جي آتم ڪٿا واڌارن ۽ سڌارن سان ترتيب)، (11) صبوحي (ترتيب)، (12) سڄ وڙاءُ (ترتيب)، (13) قافيا ڪوش (لغت: 2010ع)، (14) The Days & Dates (2010).
مخدوم جميل الزمان پنهنجي ڏاڏي ۽ والد جي روايت موجب سياست ۾ پيپلز پارٽيءَ سان واڳيل آهي. 1997ع ۾ پهريون ڀيرو سنڌ اسيمبليءَ جو ميمبر چونڊيو. 2005ع ۾ پيپلزپارٽي ضلعي حيدرآباد جو صدر چونڊيو ۽ هن اهي ذميواريون احسن نموني نڀايون. 2008ع جي چونڊن ۾ هڪ ڀيرو ٻيهر صوبائي اسيمبلي سنڌ جو ميمبر چونڊيو ۽ هن وقت بين الصوبائي رابطن جو وزير آهي، کيس جنوري 2011ع کان انٽيڪيوٽِيز کاتي جو قلمدان به ڏنو ويو آهي. هن سنڌي ٻولي قومي ٻوليءَ لاءِ اسيمبلي ۽ ان کان ٻاهر آواز اٿاريو.
مخدوم جميل الزمان هن وقت سنڌي ادبي ادبي بورڊ جو چيئرمئن؛ بزم طالب الموليٰ سنڌ جو وائيس چيئرمين؛ ڏات پبليڪيشن جو باني ۽ طالب الموليٰ اڪيڊمي هالا جو چيئرمئن آهي. هالا جي ادبي روايتن جي تسلسل کي برقرار رکڻ ۾ مخدوم جميل الزمان جون خدمتون ساراهڻ جوڳيون آهن.

داخلا ۾ استعمال ٿيل تاريخون

1961.07.27  عيسوي

مخدوم جميل الزمان ’ جميل ‘ مخدوم امين فهيم جي گهر ۾ 27 جولاءِ 1961ع تي هالا ۾ جنم ورتو .

شخصيتون - ڀاڱي جون ٻِيون داخلائون